喺一個完美嘅世界，每一場嘅表演都應該係每一個人都有一份屬於自己樂器嘅，編好哂嘅Full Score，但有時候，作歌嘅人根本就從來冇賣過甚至寫過實體嘅譜，或者本來首歌就寫俾廿個人玩，但而家我想兩三個人咁玩想搵份冇咁多parts 嘅譜，於是20年代就開始盛行一樣叫"lead sheet"呢樣野，lead 嘅意思即係首歌嘅最骨幹melody 嘅部分，同埋用旋律背後chord 嘅部分，實際點玩就留番畀樂手參透。
呢啲lead sheet 好多係非原創樂手自己想玩呢啲歌，然後靠耳仔去聽執番出黎，慢慢呢啲譜多左，就開始有人將佢地集合成書。因為譜嘅資訊太少，完全唔足以樂手將recording 原有嘅內容同感覺玩出黎，基本上只係夠大家去"fake it" (扮真係玩到）所以就叫呢d 書做fakebook 。
Fakebook 除左有上述意味，有好多時候都真係會fake 到人，因為執譜果個可能會執錯，佢又可能係執某個好特殊嘅版本你完全搵唔到recording 係好似呢份譜咁玩，同時佢亦完全無視左版權嘅問題。所以去到2004, 出版社Hal Leonard 就處理左版權問題，排好啲歌，出左本合法嘅，叫Realbook嘅fakebook(佢地係第一本realbook, 本身70s已經有大學生用呢個名不過非法所以佚名）
Realbook 可以話係學習爵士樂必經之路，大家對佢又愛又恨，一開波由零開始就唔睇realbook 所有野都靠聽會令到本來就難入手嘅jazz 難上加難，但愈學得深入就愈明白fakebook 係真係fake 嘅。即使係咁，喺未有手機app 嘅年代，真係啲jam session 都一定會有幾本realbook 喺度，有歌唔識就開書。
到左而家，個個都睇ipad 同用一個叫irealpro 嘅app ，實體realbook 已經好少可見到，但爵士樂手入到黎翻騰門口，到一定會會心微笑。
黎緊11月3號晚Ted Lo 回歸翻騰，佢一定都記得以前一間已結業嘅jazz bar Peel Fresco, 個個喺度臨場揭Realbook 嘅日子。
