喺爵士樂入面，色士風手畀好多人嘅既定印象就係好快好勁，即興嘅時候槍林彈雨，Blue Giant電影嘅配樂就正正滿足左呢一個stereo-type。 有啲人好鐘意，有啲人覺得好嘈好亂。但其實同人格一樣，即使果位大師係因為大癲大肺而出名，都必然會有佢嘅另一面。
「Koko」Charlie Parker
一講爵士樂色士風，永遠都係第一個會講Charlie Parker，但係個個都聽Parker唔通個個都想聽Parker咩。Parker當時嘅前衛音樂令到爵士樂變成一種唔單止係娛樂嘅藝術，但老實講，小弟開頭聽都係為左做個好學生，非常抗拒，覺得好多首歌都好難入耳，特別係呢首Ko Ko，一開頭兩條友唔知做乜咁之後就開始solo。而家再聽番係明白佢嘅破格同智慧，但當時仲聽緊Lady Gaga嘅小弟未識欣賞。
「If I Should Lose You」Charlie Parker
一聽到弦樂開頭，冇人會估到原來Parker都同古典樂團一齊錄過一隻碟叫Charlie Parker with Strings，玩番當時大眾覺得順耳嘅standard。呢隻碟入面嘅Parker表現得好乖仔，錄音又好好，如果覺得佢其他出名作品太怪異，不妨試下由呢隻碟入門。
「the inflatted tear」Roland Kirk
細個喺音樂室啲海報到第一次睇到呢條友，好快就畀佢表演時候嘅樣吸引左，無他，因為佢係同一時間吹緊三枝色士風，果時未有Spotify，Youtube仲係好新，我番去用有限嘅網絡去睇佢呢條片，我就永遠個印象佢只係一個好有創意嘅痴線佬，相傳佢有啲表演仲會每個觀眾派啲玩具樂器大合奏。Nerd Fact，片入面中間同左邊果兩支奇怪都係將本來S型嘅Alto Sax拉番直，唔好問點解。
「I’ll be seeing you」Roland Kirk
後黎有一日同黎過番翻騰好幾次嘅Yu Hagiwara吹水講起最影響佢係邊一個樂手，佢提番起呢個Roland Kirk(第一次有人講佢)，先知道原來佢本身都吹好多大路野，仲吹得非常之好。而家要聽番Roland Kirk易好多，佢甚少係就咁jam 首歌，好似hardbop咁點都有個編曲，感覺同好多歷史書上出現嘅名字都好唔同，有心思同獨特。
「Human Bites」 Michael Brecker
Michael Breaker可以話係八九十年代最有影響力嘅色士風手，佢出現之前冇人估到色士風Solo係可以咁勁咁rock，佢直接影響左好多而家當紅嘅樂手。雖然57歲英年早逝，但係佢當時真係勁demanding，個個都想搵佢玩，以1978年為例，佢就做sideman錄左13隻碟之餘，自己都有出碟。作為相對現代嘅樂手佢都係聽Rock同Funk大，所以好多作品都有呢啲元素，如果本身係有一顆搖滾的心，搵下佢同唔同人錄嘅碟，總有一隻碟岩你。
「The Cost of Living」Michael Brecker
不過如果真係去搵佢自己嘅碟，其實好多歌都係好slow burn，慢慢帶你入去佢個故事。好似呢首歌咁。現代人聽音樂愈來愈習慣淨係畀十秒都未必有嘅機會人，見冇乜特別就好似IG咁碌去下首，或者開始當佢背景音樂，聽完一個鐘都講唔出聽左乜，有乜感受。 試下今次畀個機會Michael Brecker，感受下紐約人同香港人共同嘅痛苦。
「Delfeayo‘s Dilemma」Kenny Garrett
Kenny Garret 同樣係一個影響好多近代樂手嘅Alto Sax，而家聽呢一首比較post-bop嘅例子可能大部份人都冇乜特別感覺。去到今時今日爵士樂百花齊放，乜都有啲嘅情況下，Bebop嘅語言同精神成為左每一位爵士樂手嘅共通課題同根基，所以出名嘅爵士樂手點都會有好多作品係同番呢種聲音掛勾。
「Happy People」Kenny Garrett
但係Kenny Garrett嘅另一面，就係佢嘅音樂好有R&B同埋Old School Hip-Hop嘅感覺喺入面，同樣源自美國黑人文化，Hip-Hop都係好多近代爵士樂手柒指嘅樂種，覺得好啲feel想繼續Un落去嘅不妨youtube搵下Kenny Garrett同August Greene嘅Tiny Desk演出，會聽到兩種好唔同但都好正嘅Groove。
「Count Down」John Coltrane
最後又同大家番番黎聽jazz一黎就好多人會提嘅名稱，之前已經有文章講過佢有幾神化，點樣創造最前衛嘅聲音最後仲變埋聖人畀人拜。又講番去清末晚期小弟想做好學生聽大師嘅時候聽到呢首，都係果句，唔知佢做乜🦮🦮
「In A Sentimental Mood」John Coltrane
但係其實而家聽佢嘅萌新，好多都係畀佢極有感情嘅慢歌吸引到，話畀大家知佢絕對唔係一個不食人間煙火嘅離地高人。呢隻碟仲要係同big band大師Duke Ellington一齊錄，可以話係雙重驚喜，如果鐘意的話，佢有另一隻碟就叫Ballads，想靜靜地但又播啲野，原來都可以揀John Coltrane。
今次嘅文章有冇令你對大師有多一份了解呢？仲有冇搵到邊個樂手係有啲好大反差嘅作品？不妨留言分享下
