Bossa Nova係一種深受由Samba同爵士樂影響嘅樂種, Samba大家一黎就會諗起熱血澎湃嘅巡遊嘉年華音樂同埋性感女郎, 但其實佢嘅起源同爵士樂非常近似, 今日黎同大家一起森巴舞。
「Candonble」 巴西黑人民間宗教
有去過爵士樂101嘅朋友都會記得, New Orlean成為爵士樂發源地嘅契機之一, 係因為佢係美國早期嘅黑奴販賣港口。巴西亦有一個販賣口Bahia，好多人由非洲去左呢個地方，鼓樂,歌唱同跳舞喺非洲宗教有好重要嘅地位，慢慢巴西就發展出Candomble呢個民間宗教, 為左防止政府嘅禁止, 佢地仲會扮係敬拜天主教，將本身自己嘅神明同啲聖人撈埋一齊黎拜。
雖然拜嘅對象乜都有啲，但無可厚非，非洲嘅獨特節奏同藝術傳統同宗教一齊傳左去巴西。
喺搵早期巴西音樂影響嘅時候，同爵士樂一樣，都係好多野都未有錄音。不過，時至今日呢個民間宗教仍然存在，呢條片係為左一個叫Ogum嘅神明做嘅儀式。
「Samba de Roda」 街頭音樂
同New Orleans Jazz一樣，早期Samba都係同街頭文化，息息相關。Bahia嘅草根除左宗教，日常都會為左娛樂同社交玩音樂。佢地會喺街頭拎起樂器圍圈演奏、唱歌、跳舞，呢個文化就係Samba de Roda。Roda嘅意思即係Circle咁解。 仍然係以鼓樂同歌唱為主，樂手同舞者都會即興。 所以我時覺得，與其話即興音樂係爵士樂而黎， 不如話係來自於黑人文化。
「Pelo Telefone」 Donga
隨著巴西舊都里約熱內盧Rio嘅蓬勃，Bahia港口嘅人連同佢地嘅音樂文化都一齊被帶埋過去。同Bahia唔同，Rio係充滿歐洲移民嘅大都會。喺拿破崙橫行歐洲期間，葡萄牙皇室為免被害，將首都改為Rio十幾年，將歐洲嘅古典音樂，宗教都帶埋去。就係咁，好似早期爵士樂咁，非洲嘅節奏同即興文化遇上歐洲嘅和聲同編曲秩序，舞台由北美嘅新奧爾良改為南美嘅里約熱內盧。
所以Pelo Telefone呢隻被認為係第一隻嘅Samba錄音，搵唔到samba最具標誌性嘅敲擊樂，反而更似民謠，相傳都係唙街頭Jam出黎。
「Rio Carnival」
上次講Bossa Nova同軍政府嘅文章提及過獨裁者Getulio Vargas，佢係咪明君我就唔知啦，但原來佢對Samba嘅推廣非常重要。
Samba本來係黑人產物，被認為係草根上唔到大台嘅野，有時仲會被政府打壓。啲人為左玩samba仲要同人講自己其實係玩緊上面提及嘅Candomble，拜緊天主教聖人。
Vargas佢想用文化聯結巴西人，於是就去支持本土嘅Samba School，呢啲學校將散亂嘅舞蹈變得系統化，仲會成日搞嘉年華同比賽。Vargas幫呢啲嘉年華搞大佢，慢慢變成而家會見到嘅大型巡遊，開始吸引到遊客同國際嘅注目，令Samba開始國際化。
「Chichete com Banana」
原本同納粹德國有貿易來往嘅Vargas 喺1939年轉投美國，後黎二戰加入同盟國，美國同巴西開始有文化嘅交流，爵士樂開始傳到去巴西。反之，亦有巴西人開始學玩Jazz。不過，唔知個個都咁鐘意美國文化，呢度搵到一首幾有趣嘅歌， 歌詞係諷刺美國人根本唔了解巴西音樂，啲咁早期嘅Distrack唔係咁易有，同大家分享下。
「Desafinado」 Joao Gilberto
不過點唔鐘意都難阻時代大局嘅演變。到左60 年代，Vergas 死後，新浪潮來到巴西。首都由Rio遷去Brasilia，政治改革，中產階級冒起，音樂日漸更受歐美文化影響。 出現左Bossa Nova呢種新樂風。對比起Samba，顯得非常文靜內儉，歌詞內容唔再係草根生活，諷刺搞笑或者係神神佛佛，而係詩情畫意，情情搭搭。Bossa被認為係來自中產，玩畀中產聽嘅音樂，Bossa嘅最重要作曲家Antonio Carlos Jobim亦係生於Rio中產社區。
「Girl From Ipanema」 Astrud Gilberto
呢首神曲被認為係繼Beetles 嘅Yesterday後被錄得最多次嘅歌，令到Bossa Nova成為全球熱捧嘅文青潮物，果陣涼風勁到幾十年後今日都仲係成日喺Cafe聽到。聽首歌捧紅左Gilberto兩公婆，幫佢地拎埋Grammy，關於呢首歌仲有好多小故事同內幕，下次有機會再同大家分享啦kuku
